Sakkie Parsons E-pos Bediening

Sakkie Parsons E-pos Bediening

Die Here het vir my laat verstaan, "die mense sal jou vrae vra en jy moet hulle antwoord".

Soms stuur iemand vir my ‘n vraag en dan sê ek vir ons Here, want ek kan dit tog nie vir Hom wegsteek nie. “Here, U weet ek weet nie hoe om hier te antwoord nie maar U het my hierdie bediening gegee en U moet asseblief nou net help." Dan gaan sit ek en ek neem my Bybel en die bronne wat ek as geloofwaardig beskou en ek skryf.  Dan, soms as ek klaar gelees het wat ek geskryf het, soos destyds met van my liedere, gaan ek heerlik aan die huil as ek sien wat ons Here in ‘n mens se lewe kan doen.

Ek stuur weekliks e-pos aan mense wat dit graag wil ontvang. Indien jy ook graag e-pos van my wil ontvang, sluit asseblief aan by my E-pos Bediening. Jy kan ook al die e-pos wat ek tot dusver aan lesers gestuur het op die E-pos Argief bladsy vind.

Let wel: My eposadres het verander na bediening@sakkieparsons.co.za. Vanaf 1 Maart 2015 gaan sparsons@absamail.co.za nie meer in werking wees nie. Die ou adres kom nog voor in al die dagstukkies en ons sal dit met die tyd korrigeer. Baie dankie vir jou geduld met my in hierdie saak.

My getuienis rondom die Wally Hayward Wedloop 2019

Sakkie Hardloop die Wally Hayward Marathon 2019Liewe vriende,

Ons Here was weereens so oneindig goed vir my sodat ek te midde van omstandighede, my derde Wally Hayward Wedloop kon voltooi.

Ek sê te midde van omstandighede omdat my vrou, Cornelia, net ‘n paar dae voor die wedloop na ons Here is waar sy haarself in ewige heerlikheid bevind....

Lees meer

Getuigskrifte

20 Aug 2019

Ek wil net eerstens sê baie dankie vir die bediening stukkies wat jy so gereeld vir my stuur. Ek mis nie een om te lees nie, en ek “save” elkeen op my rekenaar vandat jy begin het om te stuur.  

Ek besef elke keer wat ek dit lees hoe ons Hemelse Vader jou gebruik om Sy woord te verkondig.

Jy het altyd ‘n antwoord uit die Bybel wat net die waarheid verkondig.

Ek is self besig om met ‘n tema oor “Soos jy Glo” vir myself opsommings te maak waarna ek altyd kan terug verwys. En ek besef elke dag  dat mense sê hulle glo in God maar hulle het nie ‘n verhouding met Hom en leef nie volgens Sy wil nie.  Ek glo die Here sal jou elke dag seën omdat jy so getrou aan hom is.

Beste Groete,

Jan Hanekom.

Die twee gedagtes uit die Woord wat Jan gelees het en toe aan my geskryf het was:

"Die sleutel wat Jesus vir Petrus gegee het"
"About whales"

Wie is Sakkie Parsons?

Ek kan nie juis maklik oor myself praat nie. Ek dink, dit is omdat dit maar ‘n droë onderwerp is om oor te praat.

Ek is getroud en het 5 kinders, 4 meisies en ‘n seun. Ek het in moeilike omstandighede groot geword en ek was nog baie klein toe die welsyn ons van my ouers weg geneem het. Dit was ook ‘n welsynsbeampte wat agter gekom het dat daar fout met my oë is en my toe na die skool vir blindes in Worcester, wat nou bekend staan as die Pionier skool, laat stuur het. In 1973 het ek tot bekering gekom en ongeveer 3 maande later het ek vir ons Here begin werk en so ver ek kan onthou was daar net een jaar van toe af wat ek nie heeltemal betrokke by die werk van ons Here gewees het nie en dit was in 1982. Ek is volgens my vrou en van my vriende ‘n fiksheid verslaafde en as dit so is , is dit ‘n heerlike verslawing.

Toe ek my eie potjie moes begin krap, was werk moeilik om te kry en as jy nog gesiggestremd is, was dit net daardie bietjie nog moeiliker. So, ek kon destyds as gesig gestremde nie maklik werk kry nie en toe ek vir die werk as skakelbord operateur op Anglo Platinum in Rustenburg aansoek gedoen het, was ek so dankbaar om net die kans te kry om vir ‘n werk aansoek te mag doen, dat ek vir die persoon wat my geneem het vir die onderhoud gesê het, dat as ek die werk kry, ek of by daardie werk sal aftree, of hulle sal my begrawe terwyl ek nog daar werk en 39 jaar en 10 maande later kon ek deur die genade van ons Here daar aftree.

Toe die tegnologie so ontwikkel dat rekenaars met ‘n mens kon praat, was dit soos tronk deure wat vir my oopgaan. In die verlede as ek ‘n brief getik het en ek maak êrens ‘n fout moes ek die papier uithaal en van voor af begin, omdat ek nie kon sien om die fout reg te maak nie. Nou met die rekenaar wat met my praat is dit hemel op aarde.

Ek werk gemiddeld 10 plus uur op ‘n dag in my e-pos bediening, wat bestaan om te skryf wat ons Here vir my gee en mense se vrae, waar ek kan, te antwoord.

Sien jy, nou nie juis vreeslike boeiende lees stof nie maar baie dankie dat ek dit met jou kon deel.

Mag ons Here jou seën in dit wat jy op hierdie webtuiste mag vind wat jou interesseer.

Sakkie Parsons

Lees my getuienis

“Aan Hom nou wat magtig is om julle vir struikeling te bewaar en julle sonder gebrek voor sy heerlikheid te stel met gejuig, aan die alleenwyse God, ons Verlosser, kom toe heerlikheid en majesteit, krag en mag, nou tot in alle ewigheid! Amen." Judas 1:24-25